NOTE: Dahil sa mga nag request na gawan ko ng Tagalog version ang aking article tungkol sa AlDub Law of Attraction, sige... gagawin ko para sa inyo at yung simpleng Tagalog lang din gagamitin ko para maintindihan ng iba.
Ang mga hinihiling natin na mangyari sa ating buhay ay ibibigay sa atin kung taimtim natin itong pinagdarasal at kung karapat dapat ito para sa'tin. Hindi ito salita na lumalabas sa ating mga bibig kundi yung magkatugmang sigaw at ninanais ng puso at isipan. At alam ito ng Maykapal kaya sa tamang panahon, ibibigay niya ito at walang sinuman ang makakapigil sa Kanya.
Kaya nga dahil sa matagal na panahon na pang-aalipin sa atin ng mga makapangyarihan at mayayamang tao sa buong mundo, gamit nila ang telebisyon upang kontronlin ang ating mga kilos at paniniwala, marami sa atin ang ginagaya ang napapanood sa TV, mga nakikitang imahe sa mga magazines, newspapers at mga naririnig sa radyo. Naging sunud sunuran tayo sa kung anu-ano nalang na uri ng programa ang ihain nila sa ating paningin, at ang masamang epekto nito ay ginagaya ng tunay na buhay ang napapanood sa TV. Sabi nga "Life imitates art. Art imitates life." Nagdudulot ito ng matinding takot sa ating puso't isipan.
Subalit ang isang daga, kapag sobra na ang takot, magagalit rin at lalaban. Ganun ang nangyari sa napakaraming Pilipino sa buong mundo (kasama ninyo ako siyempre). Dahil sa dami ng mga suliranin sa buhay, mga hinagpis, pasakit, lungkot, pag-aalala, kawalan ng pag-asa at takot na lalo lamang pinabibigat ng mga paulit ulit at walang kakuwenta kuwentang mga drama sa telebisyon, sa ayaw man natin o sa gusto, kusang sisigaw ang puso't isipan at hihiling ng isang bagay na kakaiba at magbibigay sa atin ng saya. Dahil ang nature ng tao ay ang maging maligaya at magmahal, kapag ginagapos mo ito, kahit pigilan mo ang kanyang katawan, hinding hindi kailanman mapipigilan ang puso't isipan. Kaya nagsanib puwersa ang magkatugmang ninanais at sigaw ng puso't isipan ng napakaraming Pilipino sa buong mundo. At tumugma ito sa pattern of thoughts ng AlDub... tumugma sa taintim na dasal nina Alden at Maine. Kaya ang AlDub at AlDub Nation ay nagkatagputagpo at nabuo.
Ang AlDub ay isang loveteam. Siyempre Tagalog ito, Pilipino ka na nagbabasa kaya alam mo kung ano ang loveteam, tama? Sa mga hindi nakakaalam, ang ibig sabihin ng AlDub ay Alden + Yaya Dub. Kinuha ang Al at dinagdag ang Dub kaya AlDub. Mga tauhan ito na kathang isip para sa isang segment sa Eat Bulaga na kung tawagin ay Kalyeserye. Si Alden na medyo pilyo pero maginoo at guwapo na manliligaw ni Yaya Dub ay ginagampanan ng dramatic actor na si Alden Richards at si Yaya Dub naman na isang katulong at yaya na nagpapapangit ng mukha, hindi nakakapagsalita at nagda dubsmash lang, pero kita naman sa TV na maganda ang mukha niya, pabebe pa, ay ginagampanan naman ng Philippine Dubsmash Queen turned actress na si Maine Mendoza.
Nagsimula ang AlDub noong July 16th 2015 dahil kinilig si Maine kay Alden n'ong makita niya ang binata sa split screen na pinapanood siya. Pilit niyang itinago ang kanyang pagkakilig pero nahalata ni Allan K. (Alam ko na alam na ito ng AlDub Nation pero para ito sa hindi pa alam kung ano ang AlDub). Kaya yun, kinilig na ang lahat kasi may kakaibang chemistry na nakita natin kina Alden at Maine at habang tumatagal, napapansin ng audience na ang chemistry ng dalawa ay magkahalong "innocence and sensuality" at dahil hindi sila nagkikita ng personal at nagkukulitan lamang sa split screen, lalong natakam ang mga manonood na dapat magkita sila dahil bagay na bagay sila. Ako noong una, sabi ko, bagay nga sila pero di ko gaanong pinapansin kasi busy ako sa trabaho at kinukulit lang ako ng nanay ko na panoorin ko dahil nakakatuwa daw. Hinayaan ko lang siya kasi ang mahalaga sa'kin ay nakikita ko na laging tumatawa ang nanay ko. Sapat na yun. Kaso isang araw, may pinakita sa akin ang aking ina, isang liham para daw kay Richard Faulkerson, Jr. Noong una, ayaw ko'ng basahin pero pinilit ako ng nanay ko. Pinagbigyan ko at meron akong natuklasan tungkol sa AlDub.
Ang mga Twitter Trendsetters, AlDub Fans Club, mga baliw at loko lokong stalkers ng AlDub, mga sira ulo na tabloid writers na sinisiraan ang AlDub, mga pinuno ng mga kawang gawa at ang international media na walang kaalam alam kung ano talaga ang nangyayari, lahat ng mga grupo na ito ay nagsilbing instrumento para maging isang global phenomenon ang AlDub, at hindi lamang isang mainit na usapin sa internet na pagkatapos ng isang taon ay makakalimutan nalang basta basta. Hindi ganun ang AlDub. Iba ang AlDub.
Ang pinagkaiba ng AlDub ay hindi ito mapagkunwari tulad ng mundo ng showbiz. Tuluyan nitong winasak ang bulok, marumi at mapanlinlang na nakakasawang sistema ng mga maaarteng celebrities; kasama na rin sa ginawa ng AlDub ay ang lipulin, puksain at burahin sa balat ng Philippine Entertainment ang mga walang kakuwenta kuwentang paninda ng mga giant TV networks na mga loveteams na saksakan ng mga O.A. at mapanlinlang sa mga tao. Kaya nga lahat ng edad ay attracted sa AlDub. At hindi lang 'yan ang dahilan. Mayroong lihim sa likod ng AlDub na akala ng marami ay isang accidental loveteam.
Lahat ng mga pangyayari sa buhay natin ay hindi isang aksidente kundi nakasulat ito sa ating tadhana. May dahilan ang mga pangyayari sa bawa't isa sa atin.
Ang AlDub ay isang napakalaking kaganapan sa buhay natin ngayong siglo na ito. Mapalad ang mga nakakaunawa at nakasaksi sa muling pagtatagpo ng AlDub. At kung hindi isang palaisipan sa puso't isipan mo kung bakit nangyari ito, hindi ka na rin dapat magtaka kung bakit maraming mga tao ang bumalik sa ayos ang blood circulation at gumaling ang mga body cells at nag release ng endorphins. Kasi kung hindi mo nauunawaan kung ano talaga ang AlDub, kinakailangan mo'ng tumalon papasok sa "rabbit hole" para ikaw mismo ang manaliksik, tumuklas at makasaksi sa "Intergalatic Love Story" ng dalawang kaluluwa na nilikha ng Maykapal sa langit at pinadala sa atin dito sa lupa.
Ang AlDub ay isang pelikula na tumatakbo sa totoong buhay natin dito sa mundo, real time movie kumbaga na ibig sabihin, hindi sila artista lamang na malalaos dahil hindi magtatapos ang kuwento ng kanilang pag-ibig pagkatapos ng dalawang oras o mamaya o bukas o sa susunod na taon. Dahil susubaybayan natin ang AlDub hanggang sa kung anuman ang tahakin nila sa buhay at sa kanilang pagtanda. Ang aking kapasidad lamang bilang isang manunulat ay ang maipakilala sa inyo ang AlDub pero dahil isa itong multi-dimensional format na pelikula ng totoong buhay, meaning hindi ito isang pelikula sa flat screen o isang nobela na babasahin kundi isa itong kuwento na nangyayari sa kasalukuyan at DAMAY TAYONG LAHAT sa kuwento nina Richard Faulkerson, Jr. at Nicomaine Dei Mendoza. Dahil upang makapasok ka sa multi-dimensional na pelikula na ito, kailangan ikaw mismo ang mag-iimbestiga sa background nina Richard at Nicomaine a.k.a. Alden at Maine. Kasi hinding hindi mo talaga lubusang maiintindihan ang AlDub at kung bakit sobrang laki nito. Simulan mo na ang pag research ng files ng dalawa na siguradong manlalaki ang mga mata ninyo dahil kalakip nito ang mga patunay ng Serendipity, The Rain of 7162015, Mt. Carmel, Significance of Number 5, Divine Intervention, Thin Line Between Reel and Real at iba pang mga detalye na ibabalato ko na sa inyo para kayo na mismo ang bahalang humusga.
Kung naniniwala kayo na may Makapangyarihang Diyos na hindi natin nakikita at naniniwala din kayo na maraming planeta hindi lamang ang daigdig, at malaki ang ating kalawakan at maraming iba pang nilalang ang nabubuhay sa ibang lugar na sobrang layo, sa dako pa roon, hindi isang kabaliwan ang paniwalaan na soulmates ang AlDub. Iba't ibang pangalan o lengwahe ang ginamit nila noong unang panahon. Maraming lifetimes na rin sila nabuhay. Sa kasalukuyang lifetime natin, ang dalawang kaluluwa na ito ay gumagamit ng pangalan na Richard Faulkerson Jr./Alden Richards/RJ/Tisoy at Nicomaine Dei Mendoza/Maine Mendoza/Menggay/Meng/Yaya Dub.
Pero kahit anupaman, ang dalawang ito - ang aktor na parang wala lang at ang malungkot na babaeng payaso, kahit saan sila dalhin at kahit ano'ng pangalan man gamitin nila sa susunod na lifetime, ang kanilang powerful psychic connection, bahala na kayong maglagay ng label, love, sarang, ai, amor o anuman, kayo na bahala, naniniwala ako na magtatagpo at magtatagpo pa rin sila upang lumabas ang kanilang tunay na anyo na isang magandang nilalang at maging magka-ibigan na punung puno ng pagmamahalan sa isa't isa. At ang kanilang kuwento ng pag-ibig ay di lamang bibihag sa ating mga puso kundi magbibigay din ito ng inspirasyon sa napakaraming nilalang sa buong kalawakan. Dahil ito ay naka tadhana at biyaya ng Maykapal.
At dahil ang kanilang pagtatagpo ay laging kakaiba at makakatawag ng pansin sa nakararami, magdudulot ito lagi ng kilig. At makikita natin na may mga mas mahalagang bagay na dapat pagtuunan ng pansin sa buhay natin. Ang mababaw na kaligayahan ang napaka importanteng bagay sa mundo dahil libre ito.
"The purpose of life is joy and for us to create happiness."
Kung sa mga sandaling ito ay lubusan mo nang nauunawaan kung ano talaga ang AlDub, dama ito ng iyong puso't isipan pati na rin lahat ng laman ng iyong katawan, alam mo na hindi binigay ng Diyos ang AlDub para makatulong sa ekonomiya ng mundo na nilikha lamang ng mga "Elite" upang patuloy nilang takutin ang lahat ng tao at linlangin. Ang ekonomiya ay walang kuwenta at gawa gawa ng mga World Bankers upang maniwala tayo na dapat maghirap tayo. Pero hindi yun totoo. Dahil sa AlDub, naibalik natin ang ating mga sarili sa direksyon na ang buhay ay dapat libre lang. Dapat maging maligaya lamang tayo at ang mga mababaw at simpleng bagay ay ang mga importanteng bagay sa ating buhay. At kapag masaya tayo, ang ating body cells ay kusang naghi heal at nagri rejuvenate.
Sabihin man nila na yumayaman sina Alden at Maine dahil sa mga tagahanga, kabilang na kami ng aking butihing ina na lahat ng endorsements nila ay binili na, hinding hindi kailanman mabibili ang saya na naidulot nila sa ating mga puso.
Kahit pa lahat ng yaman ni Bill Gates o ng mga tumatae rin naman na mga Royalties ng Europe o kahit ilang milyong dolyar pa, hinding hindi nila kailanman mabibili o mapapantayan ang naramdaman ng milyung milyong Pilipino sa mga sandaling tinalikuran natin ang mapanlinlang na mundo ng ekonomiya at tumutok sa kababawan at muling pagtatagpo nina Alden at Yaya Dub sa lifetime na ito.
Nagsisimula pa lang tayo.
